Hvað gengur Norðmönnum til?

Það eru til skýringar á framferði Breta, Hollendinga og Svía (ekki þær sömu um öll ríkin), en hvað gengur Norðmönnum til? ESB er búið að ákveða að fórna Íslendingum á altari ónýts bankatryggingarkerfis. Jafnframt á að taka fyrir það að Íslendingar geti farið "dómstólaleiðina", þ.e. það á að afgreiða málið án dóms og laga. Vegna bíómynda þá tengjum við þá aðferð gjarnan við villta vestrið, þegar dómstólaleiðin var annað hvort ófær eða þótti of svifasein. Þessi aðferð, samningaleiðin svokölluð, hefur hins vegar verið iðkuð um aldir í Evrópu og altalað að þetta muni vera helzta leiðin til að skera úr um ágreining í skiptum manna á Sikiley. Þar mun dómstólaleiðin iðulega vera lokuð og farin samningaleiðin í staðin. Það heitir gjarnan að mönnum sé gert tilboð sem þeir geti ekki hafnað. Framferði Mafíunnar þar hefur verið fordæmd og lengi verið útbreidd skoðun að meðal siðaðra þjóða láti menn dómstóla um að skera úr ágreiningi um lagaleg efni. Nú er Noregur ekki aðili að ESB og þess vegna ekki bundinn af ákvörðunum sem þar eru teknar, (nema þær nái til EES líka). Hvað gengur Norðmönnum til? Hvaða hagsmunir eru svo brýnir fyrir Norðmenn að þeir styðja það að farið sé fram gegn okkur án dóms og laga?

Stjórnin gagnrýnd fyrir hörku

Athugasemdir

[Valdimar Vilhjálmsson (IP-tala skráð) 14.8.2009 kl. 11:28]

Mín skoðun er að svokallaðar "vinaþjóðir" innan Norðurlandanna séu beittar hótunum og þrýstingi af AGS, Betum, Hollendingumog ESB sem ríkjabandalagi að taka þátt í aðför þeirra að okkur varðandi icesafe, ella hljóti þær verra af, hvað sem í því kann að felast.

[Héðinn Björnsson, 14.8.2009 kl. 11:37]

Til að leita slíkra hagsmuna myndi ég skoða hvar norski olíusjóðurinn er fjárfestur.