Heitir ekki Nornahraun

Þessu nýja hrauni sem myndazt hefur við jarðelda í Holuhrauni, hefur enn ekki verið gefið nafn. Tillagan um Nornahraun byggist á því að upp kom svokallað nornahár (http://en.wikipedia.org/wiki/Pele%27s_hair). Þetta eldgos er þó ekkert sérstakt með það. Nornahár hefur áður orðið til í eldgosum á Íslandi. Hraun á Íslandi heita yfirleitt eftir einhverju í nágrenninu eða bújörð sem á landið. Búskapur er enginn nálægt þessu hrauni og fátt um örnefni þar sem lítil beit hefur verið þar um slóðir. Hraunið er að hylja töluverða sneið af svokölluðum Flæðum. Út frá því lagði ég til að hraunið yrði kallað Flæðahraun.

Nornahraun orðið 81 ferkílómetri

Athugasemdir

[Ómar Ragnarsson, 25.12.2014 kl. 17:28]

Sagnir af nornahárum í eldgosum eru ótal margar og meðal annars sá ég, að í sjónvarpsþættinum um Skaftárelda, sem settur var á diskinn "Eldurinn" er getið um þau í því gosi. 

Hraunið nýja hefur að stórum hluta runnið yfir hið eldra Holuhraun, og hluti gíganna, sem gaus úr, er sömuleiðis sömu gígar og gusu 1797. Það er alger óþarfi að vera að finna gerólíkt nafn á þetta nýja hraun, frekar en sum hraunin sem runnu úr Heklu yfir eldri hraun eða þá hraunið sem kom upp í Öskju 1951. 

[Skúli Víkingsson, 25.12.2014 kl. 22:17]

Þetta er gilt sjónarmið Ómar, en það sem mér þykir mæla gegn því er að ólíkt Hekluhraunum þá er ekki "vaninn" að upp komi hraun á Flæðum þótt það hafi gerzt nokkrum sinnum og síðast (áður en nú gaus) þegar Holuhraun rann. Hekla gýs eins og þekkt er aftur og aftur og oftast eru hraunin einfaldlega kennd við Heklu og síðan ártal með. Í Öskju er þessu ekki þannig varið, heldur eru þar Mývetningahraun, Bátshraun, Vikrahraun (sem er yngzt frá 1961) og svo framvegis. Það má alveg finna nafn á þetta hraun sem er að verða hið merkilegasta.